БИШКЕК, 31-дек. — Sputnik. Кыргызстан үчүн акциздик марканы жасап берүү боюнча чет элдик үч компаниядан арыз келгенин Мамлекеттик салык кызматы билдирди.
Маалыматка ылайык, арыздар Литва, Россия жана Беларусия мамлекеттериндеги компаниялардан түшкөн.
Конкурстун жыйынтыгы тендерге келип түшкөн арыздар каралып, акциздик маркалардын үлгүлөрү экспертизадан өткөндөн кийин чыгат.
Конкурстун жеңүүчүсү акциздик маркаларды жасоодон тышкары аларды көзөмөлдөй турчу маалыматтык системаны иштеп чыгышы керек.
Учурда Кыргызстан үчүн спирт ичимдиктерине жана тамекиге акциздик маркаларды жасап келген компания менен болгон келишим келерки жылдын февраль айында аяктайт.
