БИШКЕК, 30 дек — Sputnik. Жогорку Кеңештин депутаттары жаңы акыйкатчыны шайлоо маселесин карап жатышат. Бул тууралуу парламенттин басма сөз кызматы билдирди.
Акыйкатчылыкка "Ата Мекен" фракциясынан көрсөтүлгөн Толкунбек Исаков, Мавлян Аскарбеков, "Бир Болдондон" Абдыжапар Бекматов, "Өнүгүү Прогресстен" Алишер Мамасалиев, "Республика — Ата Журт" фракциясынан Рита Карасартова, Нуркамил Мадалиев менен Кубатбек Оторбаев "Кыргызстан" фракциясынан катышып жатышат. Кубатбек Оторбаев "Кыргызстан" менен бирге "КСДП" фракциясынын атынан дагы көрсөтүлгөн.
Учурда парламенттин депутаттары талапкерлердин программасын угуп жатышат. Андан соң парламенттин иши "суроо-жооп"форматында өткөрүлөт.
Буга чейин 10 декабрда Жогорку Кеңеш акыйкатчыны шайлай алган эмес. Үч турдан өткөн тандоодо талапкер Атыр Абдрахматова 46 добуш алса, 69 депутат каршы чыккан.
25-июнда Жогорку Кеңештин жыйынында акыйкатчы Бакыт Аманбаевдин доклады канааттандырылбай калгандыктан мөөнөтүнөн мурда кызматынан бошотулган. Мыйзам боюнча жаңы акыйкатчы бир ай ичинде шайланышы керек болчу. Бирок, бүгүнкү күнгө чейин акыйкатчынын милдетин Гүлнара Жамгырчиева аткарууда.
