БИШКЕК, 29-дек. — Sputnik. Экономика жана өнөр жай министрлиги Кыргызстандын Азиянын инфраструктуралык инвестиция банкына (АИИБ) кирүүсүн демилгелеп жатканын аталган министрлик билдирди.
Июнь айында 56 мамлекет Пекинде АИИБ түзүү боюнча макулдашууга кол койгон. Бул мамлекеттердин ичинде Кыргызстан да бар. Аталган банктын штаб-квартирасы Кытайдын борборунда жайгашмакчы.
Экономика жана өнөр жай министрлигинин айтымында, АИИБге кирүү Кыргызстан сыяктуу өнүгүп келе жаткан өлкөлөргө инфраструктураны өнүктүрүп, экономиканын туруктуу жана тез өнүгүшүн колдоого алат.
Банктын негиздөөчүлөрү болуп 57 мамлекет эсептелет. Анын алгачкы уставдык капиталы 100 миллиард долларды түзөт. Банктын жетекчилигин шайлай турган Кеңештин инаугурациялык жолугушуусу 2016-жылы Пекинде өтөт.
