БИШКЕК, 26-дек. — Sputnik. Ири көлөмдү акча талап кылган уюшкан кылмыш тобунун мүчөсү кармалганын ИИМ билдирди.
Маалыматка ылайык, октябрда милицияга Сокулуктун тургунунан арыз түшкөн. Анда азиат улутундагы эки адам жабырлануучунун үйүнө келип, күч менен ээн талаага алып чыгып ур-токмокко алышкан да 10 миң доллар талап кылышкан. Андан кийин унаасын өздөрүнө жаздыртып алууга жетишишкен. Мындан улам унаа ээсине 510 миң сом зыян келтирилген.
Бул боюнча бир нече берененин негизинде кылмыш иши козголгон. Иликтөө иштеринин натыйжасында аталган кылмышка шектүү катары Сокулукта жашаган Токтогул районунун 34 жаштагы тургуну кармалган. Ал уюшкан кылмыштуу топтун мүчөсү катары ИИМдин учетунда турганы белгилүү болду.
Учурда топтун бир нече ирет соттолгон мүчөсүн кармоо боюнча иштер жүрүп жатканы маалымдалды.
