БИШКЕК, 26-дек. — Sputnik. Ысык-Көл облусундагы Алышпаев атындагы кооперация институту жана Оштогу айыл чарба институту кесиптик окуу жай болуп түзүлөт. Бул тууралуу Билим берүү министрлиги, Улуттук тестирлөө борбору жана бир катар ЖОЖ ректорлорунун катышуусу менен өткөн коллегияда белгилүү болду.
Маалыматка ылайык, жыйында мамлекеттик эмес жогорку окуу жайлардын ишмердүүлүгү каралды. Мында атайын түзүлгөн жумушчу топ сегиз окуу жайды текшерип чыккан.
Натыйжада эки жогорку жайдын статусу төмөндөп, орто кесиптик билим берүү мекемесине айланса, Кыргызстандын Эл аралык университети, Евразиялык университет, Кыргыз-орус билим берүү академиясы жана Кыргыз-казак университетинин жетекчилигинен 3-6 айдын аралыгында кемчиликтерди жоюу талап кылынды.
Мындан тышкары, 2015-2016-окуу жылына карата абитуриенттердин кабыл алынышы текшерилип, сырттан окуу бөлүмү жоюу чечими кабыл алынды.
