БИШКЕК, 25-дек. — Sputnik. Улуттук банк бриллиант түшүрүлгөн "Ак илбирс" алтын монетасын көпчүлүктүн назарына тартуулады.
Банк башкармалыгынын жетекчиси Шамил Айдаркуловдун айтымында, пайдаланууга берилген "Ак илбирс" коллекциянын ичиндеги эң кымбат тыйын болуп саналып, 200 сомдук номиналга ээ.
"Монетанын наркы анын даярдалышына кеткен чыгымдар менен бааланат. Баалуу металлга болгон баанын өсүшү бул монетанын кымбат болушун шарттады. Тыйындын наркына доллар же евронун баасы таасир этет", — деди ал.
"Ак илбирс" Литва мамлекетинен даярдалып, 64 миң 950 сомдон сатылууда.
Айдаркулов Улуттук банк коллекциялык монеталарды сатуудан эч кандай киреше алууну көздөбөй турганын белгиледи.
"Ошол эле учурда анын кийинки сатылышы бир топ кымбат экени белгилүү. "Жаныбарлар дүйнөсү" сериясындагы монеталар нумизматтар тарабынан бааланат. Мында монеталардын нускасы да эсепке алынат. Тыйынды чогулткан акча катары да пайдаланууга болот, анткени ал жогорку сапаттагы алтындан жасалып, 0,09 караттагы эки бриллиант ташы чөгөрүлгөн", — деди жетекчи.
Кыргызстандын Улуттук банкы эгемендүүлүк жылдардын аралыгында коллекциялык 56 монета чыгарып, анын төртөө — алтын, 40ы — күмүш жана 12си — мельхиор экени маалым.
