БИШКЕК, 18-дек. — Sputnik. Премьер-министр Темир Сариев той-ашка коротулган чыгымдарды азайтуу боюнча өкмөт сунуш иштеп чыгып жатканын "Кыргызстандагы жаш балдардын өмүрүн сактоо жаатындагы жетишкендиктер жана балдарды өнүктүрүүдөгү келечек кадамдар" аттуу тегрек столдо билдиргенин өкмөттүн маалымат кызматы кабарлады.
"Күн сайын болбосо дагы ар дем алыш күнү конокко жана тойго барып, 2-5 миң сомдон короткон үй-бүлөлөр бар. Бирок, баласына 2,5 миң сом турган окуу формасын сатып берүүнү кымбат деп ойлошот. Ошондой эле, мектепте берилчү ысык тамакты жакшыртуу үчүн 500 сом төлөөнү кымбат көргөндөр бар. Эгер бир жолу тойго барбай койсо, эч нерсе болбойт. Үнөмдөгөн акчаны балдарга жумшаса болот", — деди ал.
Сариев ошондой эле, коомдо калыптанып калган мындай көрүнүштү өзгөртүү керектигин айтат.
"Эгер биз аны өзгөртө алсак абал жакшы жагына бурулат. Бар акчаны туура багытка жумшай билүү зарыл", — дейт өкмөт башчы.
Өкмөт башчысы балдарга билим берүү жана саламаттыгын чыңдоо үчүн 2016-жылы 36 миллиард сом каралганын, бирок, бул каражат балдарды толугу менен камсыздоого жетпей турганын кошумчалады.
