Свердлов РИИБдин кылмыш иликтөө бөлүмүнүна ага ыкчам кызматкери Төлөгөн Орозалиевдин айтымында 15-декабрда кечинде Бишкек шаарынын "Учкун" кичи районунун тургуну арыз менен кайрылып, төрт жаштагы бала жоголгонун билдирген. Ошол эле күнү издөө иштерин жүргүзүп бирок жыйынтык болгон эмес. Издөө-иликтөө иш-чаралары бүгүн да жүргүзүлүп жоголду делген бала атасы экөө Бишкек шаарынын четиндеги Мраморное айылындагы таежесиникинен табылган.
"Дайырбек Советбеков аттуу жаран "Учкун" районунан 7-автобуска түшүп, шаардын тышындагы айылдарда жашаган эжесиникине бармак экен. Бирок, белгисиз себептерден улам, Аламүдүн базарынан түшүп калат. Базардан баласын жоготуп жибергенин туугандары менен аялына чалып билдирип, бирок, бир аз убакыттан кийин кайра таап алган. Уулунун табылганы тууралуу кабарлабастан, шаар четиндеги Мраморный айылына кетип калган. Кыжаалат болгон туугандары милицияга кайрылган", — деди ал.
Баланын апасы күйөөсү менен бир ай мурун ажырашып кеткенин айтты. Буга чейин деле алар бир нече жолу ажырашып кайта, табышкан. Ортосунда бир уул жана бир кызы бар. Ал эркек баласы күйөөсү багам деп алганын кошумчалап, эми уулун өзүнүн колуна аларын айтты.
Ал эми Актандын атасы Дайырбек Советбеков баласын Аламүдүн базарынан чындап эле жоготуп алганын айтат. Бир аз издегенден кийин бейтааныш аял жетелеп баратканда таап алганын, андан соң автобус менен шаар тышындагы Мраморное айылына кеткенин кошумчалады.
