БИШКЕК, 16-дек. — Sputnik. Премьер-министр Темир Сариев Кытай мамлекетин Кытай — Кыргызстан темир жолунун курулушун тездетүүгө чакырды. Бул тууралуу ал аталган өлкөгө болгон иш сапарынын алкагындагы кесиптеши Ли Кэцян менен жолугушуу маалында билдирди.
Кыргызстандын премьер-министри бүгүнкү күндө кытай капиталынын колдоосу менен жасалып жаткан долбоорлор аягына чыгып калганын айтты.
"Энергетика, унаа коммуникациясы, социалдык объектилердин курулушу боюнча инвестициялык долбоорлор өз жемишин бере баштады. Борбордук Азия — Кытай газ түтүгүнүн Кыргызстан аркылуу өткөн бөлүгүнүн, Түндүк — Түштүк альтернативалуу жолдун жана нефть иштетүүчү заводдордун курулушуна чоң көңүл бөлөбүз", — деди Сариев.
Өкмөт башчы курула турган Кытай — Кыргызстан темир жолу бүтүндөй аймак үчүн чоң мааниге ээ экенин белгилеп, анын курулушун баштоону эртелетүү керек экенин кошумчалады.
"Кыргызстан аталган темир жолдун курулушу Кытайдын Жибек Жолунун экономикалык алкагы демилгесин ишке ашыруунун бир бөлүгү катары кабыл алат. Мындан тышкары, биз республиканын Азия банкынын ишине катышуу мүмкүнчүлүгүн кош колдоп колдойбуз. Кыргызстан бул финансы институтунун алкагында тыгыз кызматташууга дилгир", — деди Сариев.
Сүйлөшүүлөрдүн жыйынтыгы менен премьер-министр кытайлык кесиптеши Ли Кэцянды Кыргызстанга расмий сапар менен келип кетүүгө чакырды.
