БИШКЕК, 15-дек. — Sputnik. Кыргызстандын аэропортторунан эл аралык каттам менен учуп чыккан ар бир жүргүнчүдөн 2016-жылдын 1-январынан тарта 15 доллар өлчөмүндө төлөм алынат. Тийиштүү токтомго премьер-министр Темир Сариев кол койду.
Жогорулатылган төлөм акысын чет өлкөгө чыккан кыргызстандыктар гана төлөйт.
Мындан тышкары, Мамлекеттик мүлк фонду алынган каражатты "Манас" аэропортунун структурасына кирген эл аралык жана аймактык аэропорттордун инфраструктурасын өнүктүрүүгө жана карыздарды жабууга жумшоо боюнча сунуш киргизиши кажет.
Токтомдун аткарылышын өкмөттүн аппараты көзөмөлдөйт.
Документте төлөмдүн өлчөмүн жогорулатуунун негизги себеби мамлекеттин эл аралык жана аймактык аэропортторун өнүктүрүү болуп саналат.
Учурда эл аралык авиалиния менен учуп чыккан ар бир жүргүнчүдөн 10 доллар өлчөмүндө төлөм алынат.
