БИШКЕК, 16-ноя. — Sputnik. КРдин Транспорт жана байланыш министрлиги ар бир жүргүнчүдөн аэропорттун төлөмү иретинде 15 доллар өлчөмүндө акча алуу тууралуу токтомдун долбоорун коомдук талкууга алып чыкты.
Аэропорттук төлөм деп ар бир эл аралык каттам боюнча уча турган жүргүнчүдөн алынуучу акы аталат. Азыркы кезде анын көлөмү 10 долларды түзөт.
Ошондой эле каражат аэропортту техникалык кайра жабдууга, учуп-конуу талаасына жарык менен белги берүү системасын жабдууга, андан тышкары, "Манас", "Ош", "Каракол", "Ысык-Көл", "Баткен" аэродромдорун реконструкциялоо жана куруу иштерине, аймактык аэропортторду өнүктүрүүгө жана кароого жумшалат.
Министрликтен түшүндүрүшкөндөй, 2013-жылы өкмөт өлкөнүн бардык аэропортторунун инфраструктурасын жашыртуу тапшырмасын койгон.
ААКнын директорлор кеңеши 2013-2018-жылдарга карата жалпы көлөмү 11, 6 миллиард сом инвестициялык планды бекитип, анда аймактык аэрпортторду реконструкциялоо иштери да каралган.
Ошону менен катар "Манас" аэропортуна ("ЭМА" ААК) инвестициялар 2013-2015-жыл аралыгы үчүн каралып, имараттарды реконструкциялоо жана аэровокзалга кошумча курулуштарды салуу, жабдууларды жаңылоо жана атайын техниканы жарым-жартылай сатып алуу боюнча башталган иштерди аягына чыгарууга гана эсептелген.
"Манас" аэропортунун аймагында жана инфраструктуралык долбоорлор менен ишкердикти өрчүтүү жана учуп-конуу тилкесин куруу аталган программада каралган эмес деп айтылат долбоорго карата берилген түшүндүрмөдө.
Ошол эле учурда аэропортко карай жол "ЭМА" ААК, Россиялык-Кыргыз өнүктүрүү фонду жана башка булактардын каражатына оңдолуп жатат. Мындай чечим быйыл 12-мартта өткөн премьер-министрдин кеңешмесинде кабыл алынган.
Аэропорт пайдаланууга 1974-жылы берилген. Жасалма учуп-конуу тилкесинин каптамы акырындык менен начарлап баратат. Жыл сайын буга 7-8 миллион сом жумшалат.
Транспорт министрлигинде, эгер аталган тилке капиталдык оңдоодон өтсө, жакынкы он жылда жер-жерлерин оңдоо иштерин жүргүзбөй койсо болот. Мындан 80 миллион сомго чейин үнөмдөп калуу мүмкүндүгү болжолдонууда.
Жыл сайын "ЭМА" ААК учуулар үчүн төлөмдөн 500 миллион сомдон ашык киреше алат. Бул жарандык учактарды тейлөөдөн түшө турган жалпы кирешенин 30 пайызын түзөт.
