БИШКЕК, 15-дек. — Sputnik. Баткен облустук мусулмандар казыяты эл арасында ашыкча ысырапкерчиликтин алдын алуу боюнча элге түшүндүрүү иштерин баштады. Бул туурасында Баткен облустук мусулмандар казыятынын маалымат кызматы билдирди.
Кыргызстан мусулмандарынын муфтияты бул боюнча атайын токтом чыгарган.
Облустун казысы Пазыл Султанмуратов райондук хатиптерге жума намазда жана мечиттердеги сабактарда түшүндүрүү иштерин жүргүзүү тапшырмасын берди.
"Эл арасындагы жакшылык-жамандыктарда, өлүм-житим, той-топурларда жана ар кандай иш-чараларда ысырапкерчиликтен алысыраак болуп, анын алдын алуу максатын көздөп жатабыз", — деди облус казысы Султанмуратов.
Эл арасындагы мындай тенденцияны азайтуу боюнча пикирлер коомчулукта бир нече жылдардан бери айтылып келет.
