БИШКЕК, 14-дек. — Sputnik. Жогорку Кеңеш акыйкатчы кызматына документтерди кабыл ала баштаганын парламенттин сайтынан белгилүү болду.
Парламенттин Конституциялык мыйзам, мамлекеттик түзүлүш жана сот-укуктук маселелер боюнча комитет жетекчисинин орун басары Алмамбет Шыкмаматов Sputnik агенттигине берген маегинде акыйкатчы кызматына өткөн шайлоого катышкан талапкерлер добуш берүүгө катыша албай турганын белгиледи. Буга чейинки шайлоого тогуз адам катышкан.
"Мыйзам боюнча да, логика боюнча да аталган талапкерлерге баа берилди", — дейт Шыкмаматов.
Депутат акыйкатчы акыркы шайлоодон 14 күн өткөндөн кийин 30 күндөн кеч эмес шайланышы керектигин кошумчалады. Демек, январдын ортосунда Жогорку Кеңеш дагы бир ирет Акыйкатчыны тандоого аракет кылат.
Болочоктогу талапкерге төмөнкү талаптар коюлат:
- Кыргызстандын жарандыгы;
- Башка өлкөнүн жараны болбош керек;
- Мамлекеттик жана расмий тилди билүү;
- 30 жаштан 65 жашка чейин;
- Сот жообуна тартылбашы керек (Бул ИИМдин маалымат кызматы тарабынан тастыкталышы кажет).
Жогорку Кеңеш 25-июндагы жыйынында буга чейинки акыйкатчы Бакыт Аманбаевдин иш-аракетин канааттандырарлык эмес деп таап, кызматынан мөөнөтүнөн мурда бошоткон. Мыйзам боюнча акыйкатчыны шайлоо бир ай ичинде, башкача айтканда 25-июлга чейин шайланышы керек болчу.
Аманбаев кызматтан кеткенден кийин анын милдетин аткаруучу болуп, орун басары Гүлнара Жамгырчиева дайындалган.
