БИШКЕК, 10-дек. — Sputnik. УКМК Транспорт жана коммуникация министрлиги менен "Транском" мамлекеттик ишканасынын аракетинде кызмат абалынан кыянаттык менен пайдалануу фактысы аныкталганын аталган мекеме билдирди.
Маалыматка ылайык, Кыргызстандын Бажы биримдигине кошулуу боюнча пландык иш-чаранын негизинде "Транскомдун" имаратын оңдоо максатында 2015-жылдын июлунда министрлик менен "Евразия Телеком групп" ишканасынын ортосунда 16 миллион 540,9 миң сом суммага жумуш аткарууга, кызмат көрсөтүүгө жана жабдыктарды жеткирип берүүгө келишим түзүлгөн.
Текшерүү учурунда оңдоо-курулуш иштеринин баасы 3 миллион 121,5 миң сомго жогорулатылган факты аныкталган. Мындан сырткары, экспертизага ылайык долбоордук-сметалык документ иштелип чыккан эмес. Ал эми аткарылган жумуштардын актысында чыгымдардын эсеп-кысаптар жасалма жогорулатылып, актыга ашыкча жумуштар киргизилген.
Натыйжада мамлекетке 4 миллион 463,6 миң сом зыян келтирилген.
Бул факты боюнча "Кызмат абалынан кыянаттык менен пайдалануу" жана "Алдамчылык" беренелерине ылайык кылмыш ишин козгоду.
Азыркы маалда тергөө иштери жүрүп жатат.
