БИШКЕК, 8-дек. — Sputnik. Россиянын президенти Владимир Путин Time журналынын "Жыл адамы – 2015" рейтингинин сегиз адамдан турган кыска тизмесине киргенин NBC NEWS каналы билдирди.
Time журналынын белгилешинче Владимир Путин ДАИШ террордук тобуна каршы күрөшүүдө чечүүчү ролду ойнойт.
Кыска тизмеге Ирандын президенти Хасан Роухани да кирди. Андан сырткары тизмеде Германиянын канцлери Ангела Меркель да бар. Ал быйыл болгон маанилүү саясий жана экономикалык чечимдерди кабыл алууда башкы фигуранттардан болду.
Times журналы "Жыл адамы" рейтингин 1927-жылдан бери чыгарып келет. Бирок, 1950-жылдан тарта бул наам абстрактуу нерселерге да берилип баштаган. 1950-жылы "Жыл адамы" наамы Кореядагы согуш курчуп турган маалда "Америкалык аскердин" образы үчүн берилген. 2003-жылы Ирактагы согуш кызып турган учурда да "Америкалык аскердин" образы "Жыл адамы" деп табылган. Андан тышкары бул наам "венгрия көтөрүлүшүнө" (1956), "АКШнын окумуштуулары" (1960), "беби-бумер" (1966), "АКШнын орто классы" (1969), "американын айымдары" (1975), ошондой эле "персоналдуу компьютер" (1982) жана "жер планетасына" (1988) да берилген.
Өз кезегинде "Жыл адамы"наамын Адольф Гитлер (1938), Уинстон Черчилль (1940 жана 1949), Иосиф Сталин (1939 жана 1942), Елизавета II (1952), Аятолла Хомейни (1979), Иоанн Павел II (1994), Марк Цукерберг (2010) алган. 2001-жылы 11-сентябрдагы терактан кийин журнал "Жыл адамы" наамын Усама бен Ладенге берүүгө батынган эмес. Анын ордуна терактын кесепеттерин жоюуга жигердүү катышкан Нью-Йорктун мэри Рудольф Жулианиге ыйгарган.
Time журналынын "Жыл адамы" наамын Россиядан Иосиф Сталин (эки жолу), Никита Хрущев, Михаил Горбачев, Юрий Андропов жана Владимир Путин алышкан.
