БИШКЕК, 6-дек. — Sputnik. Кыргызстанда терроризмге каршы күрөшүп келген окумуштуу, имам жана эксперттерди коргоо боюнча эч кандай аракеттер көрүлбөй турганын кол салууга дуушар болгон белгилүү аалым Кадыр Маликов өзүнүн Facebook тармагындагы баракчасына жарыялаган.
Кайрылууда Маликов ага болгон кол салуудан кийин бийлик эч кандай реакция кылбай, бул маселе боюнча өз позициясын билдирбегенин белгилейт.
"Терроризмдин идеологиясына каршы күрөшүп келген илимпоз, аалым, эксперттерди колдоо боюнча эч кандай аракет жок", — дейт ал.
Маликовдун айтымында, мамлекеттин унчукпаган позициясы бир да эксперт же теолог үчүн коопсуздук жана колдоо кепилденбей турганын белгилейт.
"Коомчулукка таасир этүүчү бир катар ислам таануучу менен теологдор экстремизм темасы боюнча маектешүүдөн кадимкидей жалтанып калышты", — деп айтылат билдирүүдө.
Кылмышка шектүүлөр ошол эле күнү Кордайга чыгып, андан ары Түркияга учуп кетишкен. Эл аралык издөө жарыяланып, алар Түркиянын Газиантеп шаарында колго түшкөн.
Маликов өзү ага ДАИШ эл аралык террористтик топтун өкүлдөрү кол салганын айткан.
