БИШКЕК, 4-дек. — Sputnik. Москва шаарында 10-11-декабрь күндөрү "Кыргыз-Экспо-2015" эл аралык бизнес-форуму өтө турганын Экономика жана өнөр жай министрлиги билдирди.
ЕАЭБ шартындагы кыргыз бизнесине жана экспорт маселесине арналган форум Экономика жана өнөр жай министрлиги, "Бирдиктүү терезе борбору" мамлекеттик ишканасы жана "Кыргыз биримдиги" коомдук фонду менен биргеликте уюштурулууда.
Иш-чарада кыргызстандык ишкерлер ЕАЭБ мамлекеттеринин Россия рыногу өздөштүрүү боюнча иш тажрыйбасы менен таанышып, жаңы аспектилерден маалымат алууга мүмкүнчүлүк алышат.
Кыргызстан үстүбүздөгү жылдын 12-августунан тартып Евразия экономикалык биримдикке толук кандуу мүчө болгон. Мындан улам кыргыз-казак чек арасындагы бардык бажы процедуралары алынып, Кыргызстандын аймагында бирдиктүү бажы тарифи жана ЕАЭБ ишмердүүлүгүнүн тышкы экономикалык бирдиктүү товар номенклатурасы киргизилген.
