БИШКЕК, 29-ноя. — Sputnik. Бишкекте эки күндөн бери күндөп-түндөп Манас айткан жомокчуларга туш тараптан келип бата беришүүдө. Бул тууралуу "Саякбай манасчы" коомдук фондусунун өкүлү, белгилүү манасчы Талантаалы Бакчиев билдирди.
Манас айтуу 27-ноябрь күнү башталган. Манасчылар көпчүлүктүн суроосу менен "Семетей" окуясын айтышууда. Бир сааттан баштап төрт-беш саатка чейин окуяны бири-бирин улап айтып жаткан манасчыларга Жалал-Абаддан Салимбай Турсунбаев, Таластан Камил Мамадалиевдин келип кошулганы маалым болду.
Бакчиевдин айтымында, эртең, 30-ноябрь күнү көлдүк манасчылардын келиши күтүлүүдө.
Манас айтуу 4-декабрь күнү белгиленүүчү "Манас күнүнө" карата соңуна чыгат. Кыргызстанда "Манас күнү" 2013-жылдын 4-декабрында "Манас", "Семетей", "Сейтек" үчилтиги адамзаттын материалдык эмес маданий мурасы катары ЮНЕСКОнун тизмесине киргенден бери белгиленип келет.
