БИШКЕК, 24-ноя. — Sputnik. Бүгүн, 23-ноябрда саат 16.00гө карата Ош облусунда жер титирөөдөн жабыркагандар үчүн 1 миллион сом чогултулганын ӨКМ билдирди.
Буга чейин премьер-министр Темир Сариевдин тапшырмасы менен табигый кырсыктан жапа чеккендер үчүн Өзгөчө кырдаалдар министрлигинин түштүк борборунун базасында атайын эсеп ачылган. Бардык каалоочулар материалдык жардам көрсөтө алат.
Гуманитардык жана товар-материалдык жардам көрсөтүү үчүн Арсланбек Айдаров менен 0 (772) 00-69-82, 0 (312) 29-11-51 (Бишкек), 0(3222) 7-24-70 (Ош) телефондору аркылуу байланышууга болот.
Үстүбүздөгү жылдын 17-18-ноябрь күндөрү очогу өлкөнүн түштүк аймагында жайгашкан 4-7 баллдык үч жер титирөө болду. Андан жүздөгөн үйлөр жараксыз абалга келип, жашоочулар эшикте калган. Кырсыктан кийин аларга дароо боз үй менен чатырлар жеткирилген. Учурда үй-жайсыз калган тургундар мобилдүү турак-жай жасалчу контейнерлер менен камсыздалууда.
