БИШКЕК, 23-ноя. — Sputnik. Өткөн жумада Ош облусунда болгон жер титирөөнүн келтирген чыгымдары такталууда деп ӨКМдин маалымат кызматы билдирди.
Кырсыктын кесепетинен Ош шаары, Кара-Суу, Алай, Өзгөн, Кара-Кулжа, Араван жана Чоң-Алай райондору жабыркаган.
Учурда облус боюнча үч миңге жакын турак-жай текшерүүгө алынган. Анын ичинен 1-даражада 856 үй, 2-даражада миңге жакын үй, 3-даражада 670 үй, 4-даражада 430 үй, 5-даражада 11 үй жабыркаганы аныкталган.
Ошондой эле 105 социалдык объект иликтенип, анын ичинен 1-даражада 36 объект, 2-даражада 29 объект, 3-даражада 29 объект, 4-даражада 11 объект жабыркаган.
Учурда тактоо иштери улантылууда.
Жер титирөөдөн жабыркаган аймакка мамлекеттик мекемелерде иштегендер бир күндүк айлыктарын которууда. Ошондой эле, жеке ишкерлер да биринчи кезекте керек болгон жардамдарды берүүдө.
