БИШКЕК, 24-ноя. — Sputnik. Бишкектин мэри Кубанычбек Кулматов менен Санкт-Петербург шаарынын вице-губернатору Ольга Казанская Кыргызстандын борборунда өткөн жолугушууда эки калаанын ар кыл тармактагы кызматташуу маселелерин талкуулашты.
Кеңейтилген курамдагы жолугушууда экономика, билим берүү, саламаттыкты сактоо жана маданият тармагындагы кызматташуу боюнча сүйлөшүүлөр жүрдү.
Кулматовдун айтымында, эки шаарды көп убакыттан берки достук, жылуу мамиле байланыштырып турат. Буга үстүбүздөгү жылдын июнь айында Россиянын түндүк калаасында Айтматов атындагы гүл багынын ачылышы айкын күбө.
"Сиздерди тосуп алууга куштарбыз. Бардык багытта сиздер менен кызматташууга даярбыз", — деди Бишкектин жетекчиси.
Санкт-Петербургдун вице-губернатору Бишкек менен Россиянын түндүк борбор шаары өнөктөш экенин белгиледи.
"Биз кызматташуу тууралуу узун сабак кеп кылып айта берсек болот. Бирок карапайым эл муну иш жүзүндө сезип туйбаса, бул жөнүндө айтып бекер", — деди Казанская.
Бүгүн мындан тышкары, эки тараптуу кызматташуу боюнча конференция өтөт. Ошол эле жерде Санкт-Петербургдагы губернатордук физика-математикалык лицей менен Бишкектин №9 окуу комплексинин жана эки автожол колледждеринин ортосунда квалификацияны жогорулатуу боюнча макулдашууга кол коюлмакчы.
