БИШКЕК, 19-ноя. — Sputnik. Бишкек менен Санкт-Петербург шаарларынын искусство чеберлеринин биргелешкен гала-концерти өтө турганын мэрия билдирди.
Маалыматка ылайык, үстүбүздөгү жылдын 24-ноябрында боло турган иш-чара Санкт-Петербург шаарынын маданий-ишкердик миссиясынын алкагында өтөт. Делегациянын Бишкекке 23-ноябрда келиши күтүлүүдө. Мында тараптар сүйлөшүүлөрдү жүргүзүп, Бишкек менен Санкт-Петербург шаарларындагы лицейлер ортосундагы кызматташуу боюнча макулдашууларга кол коюлмакчы.
Концертте Россиянын эмгек сиңирген артисттери менен бирге Абдылас Малдыбаев атындагы Кыргыз улуттук академиялык опера жана балет театрынын таланттары жана симфониялык оркестринин өнөрү тартууланат.
Иш-чара Опера жана балет театрында өтүп, бардык каалагандар үчүн эшик ачык болот.
