БИШКЕК, 23-ноя. — Sputnik. Бишкектин ШИИБнин убактылуу кармоочу жайында жашы жете элек төрт бала мыйзамсыз кармалып жатканын Акыйкатчы институту билдирди.
Маалыматка ылайык, аталган мекеме Бишкектин ички иштер башкармалыгындагы убактылуу кармоочу жайларды текшерип, абалы менен таанышып чыккан. Натыйжада мыйзамда белгиленген 48 сааттан ашуун убакыт кармалган 15-17 жаштагы төрт өспүрүм аныкталган.
Бул факт боюнча Акыйкатчы институту Бишкек ШИИБ жетекчиси Кашкар Жунушалиевге кат жолдонуп, мындан тышкары, балдардын укугун бузган убактылуу кармоочу жайдын жетекчилигине карата чара көрүү өтүнүчү менен ИИМ башчысы Мелис Турганбаевге сунуш менен кайрылды.
