БИШКЕК, 19-ноя. — Sputnik. Ош облусунда болгон жер титирөөнүн кесепети масштабдуу экенин, мындан улам мамлекеттик органдар тезинен бардык чараларды көрүшү зарылдыгын премьер-министр Темир Сариев кырсыктын кесепетин жоюу боюнча чукул жыйында билдирди.
Өзгөчө кырдаалдар министри Кубатбек Бороновдун маалыматы боюнча, Ош облусунда 3400 турак жай текшерүүгө алынган. Анын ичинен I даражада – 670 үй, II даражада — 1615 үй, III даражада — 725 үй, IV даражада – 380 үй жана V даражада – 10 үй жабыр тартканы аныкталган. Ошондой эле 112 социалдык объект иликтенип чыккан.
Жыйын жүрүшүндө Сариев ӨКМ жана Ош облустук, Кара-Суу жана Алай районунун жетекчиликтерине үйлөрдү текшерүүнү улантып, бир жуманын ичинде толук бүткөрүү тапшырмасын берди. Ошондой эле жабыр тарткандарга тез арада чатырларды жеткирүүнү, Мамлекеттик материалдык резервдер фондуна жакынкы аралыкта биринчи зарылдыктагы азык-түлүк менен камсыздоону тапшырды.
Муну менен катар кырсыктын масштабын эске алуу менен аларга жардам көрсөтүү боюнча эл аралык уюмдарга кайрылуу милдетин Тышкы иштер министрлиги аркалады.
Сариев Саламаттыкты сактоо министрлигине жабыркаган жарандардын арасында психологиялык жардам көрсөтүүнү, башка аймактарга жер титирөө болгон райондорго жардам көрсөтүүнү тапшырды.
