БИШКЕК, 19-ноя. — Sputnik. Жер титирөөдөн жапа тарткан Алайга 10 боз үй жана 20 чатыр алып келингенин премьер-министр Темир Сариев аталган аймактын эли менен жолугушуу учурунда билдирди.
Үстүбүздөгү жылдын 17-18-ноябрь күндөрү болгон зилзаладан Алайда жергиликтүү калк жашаган турак үйлөргө ар түрдүү деңгээлде зыян келтирилген. Зыяндын деңгээлин учурда атайын комиссия аныктап жатат. Премьер-министр табигый кырсыктан жабыр тарткандарга мамлекет жардам көрсөтөрүн белгиледи.
Мындан сырткары, Сариев 10 күндүн ичинде Алай районундагы жалгыз бой аялдын үйүн бутүрүп берүүнү тапшырды. Эки баласы менен неберелерин жалгыз караган аялдын турак жайы жараксыз абалда экени аныкталган.
Сариев кырсыкка байланыштуу атайын жыйын өтөрүн, анда тиешелүү чечимдер кабыл алынарын маалымдады. Премьер-министр жарандарды турак-жай салууда анын бекемдигине көңүл буруу керектигин айтып, бул кырсыкты сабак катары кабыл алуу зарылдыгын билдирди. Бул жаатта турак-жайды милдеттүү түрдө камсыздандаруу боюнча чечим кабыл алынып, 2016-жылдын 1-февралынан тарта ал күчүнө кирерин кабарлады.
Ошондой эле Темир Сариев жер титирөөдөн жабыркаган Алай районундагы Жылуу-Суу орто мектебинин абалы менен таанышып, аны капиталдык оңдоодон өткөрүү тапшырмасын берди.
