Сариев жер титирөөдөн жабыркагандар мобилдүү турак жай менен камсыз болорун убадалады

БИШКЕК, 19-ноя. — Sputnik. Жер титирөөдөн тамдары жабыркаган үй-бүлөлөр мобилдүү турак жай менен камсыз болорун премьер-министр Темир Сариев убадалады.

Эки күндүн ичинде үч ирет жер титирөөсүнөн үйлөрү жабыркаган Ош облусунун эли менен жолугуп, кырсыктын кесепеттерин жоюу иштери менен таанышуу максатында өкмөт башчы бүгүн эртең менен түштүк аймакка жөнөп кеткен.

Өзгөчө кырдаалдар министри Кубатбек Бороновдун билдирүүсү боюнча Жарандык коргоо комиссиясы 3381 үйдү текшерип чыгып, анын 297 турак жайы I даражадагы, 1401 үй II, 856 там III, ал эми 227 турак жай IV даражадагы кыйроого туш болгон. Мындан тышкары 115 соцобъект текшерилип, жабыр тарткандары аныкталган.

Зилзаладан үйлөрү жараксыз абалга кабылган жашоочуларга 50 чатыр берилген. Элдин суранычы менен дагы 100 чатырдын жеткирилиши күтүлүүдө. 

Жолугушууда премьер-министр жапа чеккен эл мобилдүү турак жай менен бирге жетишпеген үй-бүлөлөр керектүү азык-түлүк — ун, күрүч, май менен толук камсыз боло турганын белгиледи. 

Өз кезегинде ӨКМ жетекчиси Боронов жергиликтүү бийлик органдарына үйлөрү жараксыз абалга келген тургундарды убактылуу боз үйгө жайгаштыруу маселесин карап чыгууну тапшырды. Анын айтымында, боз үй жылуу келип, андагы шарттар да чатырга караганда бир топ ыңгайлуу.