БИШКЕК, 19-ноя. — Sputnik. Ош облусунун Кара-Суу районундагы Кызыл-Суу айылына жер титирөөдөн жабыркагандар үчүн 50 даана чатыр жөнөтүлдү. Бул тууралуу ӨКМдин маалымат кызматы билдирди.
Мындай жардам берүү чечими жер титирөөнүн келтирген зыянын эсептөө, калкка биринчи жардам көрсөтүү боюнча Өзгөчө кырдаалдар министри Кубатбек Бороновдун жетекчилиги алдында өткөн жыйында кабыл алынган.
ӨКМдин кризистик абалды башкаруу борборунун жетекчиси Мухаммед Сваровдун айтымында, Ош облусу боюнча төрт жарым миңден ашык үй текшерилип, анын 379у авариялык абалга келип, 2829 үйдүн дубалдарында жарака пайда болгон. Андан сырткары, элүүдөй социалдык имараттардын дубалдары жарылса, беш социалдык имараттын абалы авариялык деп бааланган.
Белгилей кетсек, эки күндүн ичинде Кыргызстандын түштүк аймагында 7 баллдан 4 баллга чейин үч жолу жер титиреген.
