Түркияда дагы бир журнал Алыкул акынга арналып чыкты

БИШКЕК, 16-ноя. — Sputnik. Cтамбул шаарында түрк тилинде кыргыз адабиятынын материалдарын чагылдыруучу "Ala Too Edebıyatı" деп аталган журналынын кезектеги саны быйыл 100 жылдыгы белгиленип жаткан Алыкул Осмоновго арналды. 

Бул санда акындын өзү жөнүндө баяны берилип, андан соң Кыргызстанда бир топ жыл жашап кеткен Ибрахим Түркхандын котормосунда "Жашасын жаз", "Жолдо", "Булбул ыры", "Ысык-Көлгө" жана дагы бир катар ыры түрк окурмандарына тартууланат. Анкара университетинин профессору Гүлзура Жумакунова акын жөнүндө көлөмдүү макаласын басып, айрым ырларын кыргыз жана түрк тилдеринде салыштырып талдоого алат. Кыргыз-түрк "Манас" университетинин профессору Осмонакун Ибраимовдун макаласы акындын поэтикалык дүйнөсүн ачып берүүгө арналса, Чүй университетинин профессору Шаршенбай Ажибековдун макаласы "Алыкул жана музыка" деп аталат.

"Алыкул үй-борборунун" жетекчиси жана негиздөөчүсү Памирбек Казыбаевдин, Гази университетинин докторанты Нурабүбү Борсокееванын макалалары да Алыкул темасын ар түрдүү өңүттөн аңтарып көрөт. Акындын чыгармачылыгындагы устат-шакирт, таалим-таасир маселелери тууралуу Омор Кучукмехмед уулу ой жүгүртсө, Абдырасул Исаковдун макаласы акындын чыгармачылыгынын Түркияда кабыл алынышына багытталат. 

Бул санда Айдарбек Сармамбетовдун аңгемеси, Эври Каракаянын кыргыз жазуучусу Мурза Гапаровдун "Күнөстүү арал" повести тууралуу макаласы да басылган.

"Ala Too Edebıyatı" — Түркиядагы Кыргызстан маданий жана достук коомунун алып барган долбоорлорунун бири.

Быйыл акындын 100 жылдыгын белгилөө боюнча өкмөттүн атайын токтому чыккан. Кыргыз поэзиясынын классиги Алыкул Осмоновдун мааракесине карата бир топ маданий иш-чаралар уюштурулууда.