БИШКЕК, 13-ноя. — Sputnik. 2015-жылдын он айында 18 миллион 981 миң сомдук контрафактык спирт ичимдиги алынган. Бул тууралуу Мамлекеттик салык кызматы билдирди.
Маалыматка ылайык, аталган мөөнөт ичинде 645 чарба субъектилери текшерилип, мыйзам бузуунун 142 фактысы аныкталган. Жыйынтыгында 221 миң 603 бөтөлкө алкоголдук продукция тартып алынган.
Жасалма акциз маркалары жана лицензиясы жок ишмердиктерди жүргүзүү боюнча сегиз кылмыш иши козголгон.
2015-жылдын 1-ноябрындагы абал боюнча республиканын аймагында этил спиртин жана алкоголдук продукцияларды өндүрүүдө жана жүгүртүүдө 44 лицензия жана алкоголдук продукцияларды импорттоодо 144 лицензия иштеген.
Жылдын башынан тартып ички продукцияга акциздик салык боюнча бюджетке 555 млн. сом келип түшкөн.
