БИШКЕК, 5-ноя. — Sputnik. Кыргызстандын аймагында тогуз айда 105 кишини кутурган жаныбарлар тиштеген. Бул тууралуу Саламаттык сактоо министрлигинин Оорулардын алдын алуу жана санитардык эпидемиологиялык көзөмөл департаменти билдирди.
Маалыматка ылайык, аларга маалында медициналык жардам көрсөтүлүп, өмүрү сакталган. Андан сырткары өз маалында дарыгерлерге кайрылбагандыктан Талас облусунун Кара-Буура районунун 72 жаштагы тургуну каза болгон. Аны чөө тиштеп алган.
Жакында эле Ош шаарында төрт кишини ит тиштеп, алар ооруканага жаткырылган.
Жабыркагандарды негизинен ит, келемиш, мышык, ат, эшек, чочко, карышкыр жана түлкү тиштеген.
Оорунун алдын алуу үчүн жаныбар тиштеген учурда сөзсүз түрдө дарыгерлерге кайрылуу керектиги калк арасында түшүндүрүлдү.
