БИШКЕК, 4-ноя. — Sputnik. Египетте Синайдын үстүнөн учуп бара жаткан россиялык лайнердин кулашына кыймылдаткычтагы жарылуу себеп болгон. Бул туурасында "Аль-Масри аль-Яум" басылмасы кырсыкты иликтеп жаткан сот комиссиясындагы булакка таянуу менен билдирди.
Гезиттин маектешинин айтымында, мындай тыянак "кара кутулардагы" жазуулар окулгандан кийин келип чыккан. Жарылуунун себеби "мындан аркы лабораториялык изилдөөлөрдөн кийин, ошондой эле кырсык болгон жерден кошумча маалыматтар чогулган соң аныкталаарын" айткан.
Эксперт-адис "жазуулардагы маалымат учкучтар кырсык болор алдында жердеги кызматтарга кайрылбаганын көрсөтүп жатат," — деп билдирген.
Россиялык жана советтик авиациянын тарыхындагы эң чоң кырсык ишемби күнү болду: "Когалымавиа" компаниясына караштуу Airbus A321 учагы Шарм-эш-Шейхтен Санкт-Петербургга учуп келе жатып кыйроого учураган. Андагы 217 жүргүнчү жана экипаждын жети мүчөсү – баары курман болгон.
