БИШКЕК, 4-ноя. — Sputnik. Парламентте Жогорку Кеңештин төрагалыгына талапкер Асылбек Жээнбеков депутаттардын суроосуна жооп берди.
"Ата Мекен" фракциясынан депутат Аида Салянова Жээнбековго депутаттардын жардамчыларын жана аппарат кызматкерлеринин саны кыскартуу тууралуу суроо берди. Анын айтымында, шайлоочулар Жогорку Кеңеште өтө көп адам иштей тургандыгын айтышкан.
"Бүгүнкү күндө штат бирдигин оптимизациялагандан кийин комитеттер да аппарат да натыйжалуу иштеп жатат. Аларды кыскартуунун зарылдыгы жок", — деди Жээнбеков.
"Бир Бол" фракциясынан депутат Мыктыбек Абдылдаев Жээнбеков төрага болуп шайланып калса, "Ала-Арча" мамлекеттик резиденциясындагы үйдөн баш тартуу оюнун бар-жогу тууралуу суроо салды.
"Бул артыкчылыктардын бири. Биз алардан баш тартууну көздөп жатпайбызбы", — деди депутат.
Жээнбековдун айтымында, анын резиденциядагы үйдөн баш тартууга укугу жок, анткени мунун баары мыйзамда белгиленген.
"Мен бийлик бутагынын баары артыкчылыктардан баш тартат деп кепилдик бере албайм. Биз Жол кайгуул кызматынын коштоп жүрүүсүн алып салдык. Ал эми бул убакытты үнөмдөөгө жакшы жардам берчү", — деди талапкер.
Бүгүн парламент төраганы, вице-спикерлерди, комитет төрагаларын шайлап, премьер-министр менен өкмөттүн курамын бекитиши керек, мындан тышкары, өкмөттүн структурасы жана программасын кароо күтүлүүдө.
