БИШКЕК, 4-ноя. — Sputnik. Үстүбүздөгү жылдын 9-октябрында үч эм кызды жарыкка алып келген экинчи топтогу майып Жылдыз Казиевага Токмок шаарынан эки бөлмөлүү батир берилгенин Саламаттык сактоо министрлиги билдирди.
Балдар мындан бир күн мурун ооруканадан чыгарылды. 15-октябрда наристелер Чүй төрөт үйүнөн Эне-баланы коргоо улуттук борборуна которулуп, дарылануудан өтүшкөн. Патология жана ара төрөлгөн балдардын бөлүм башчысы Сагын Абдувалиеванын айтымында, ымыркайлар учурда өз алдынча эмүүгө жарап калышты.
"Кыздар күндөн күнгө чоңоюп, салмагы жогорулап бара жатат. Өпкөсү, баш мээси өрчүп, активдүү боло башташты", — деди дарыгер.
Үч эм 1,7 килограмм, 1,8 жана 1,6 килограмм салмак менен төрөлүшкөн. Аларга Айдай, Адеми жана Айбийке деген ысымдар ыйгарылган.
