ЕАЭБдин бир жылдыгына карата Улуттук банк 10 сомдук күмүш монета чыгарды

БИШКЕК, 2-ноя. — Sputnik. Улуттук банк "Евразия экономикалык союзу" коллекциялык 10 сомдук күмүш монетасын жүгүртүүгө чыгарганын аталган мекеме билдирди. 

Маалыматка ылайык, Евразия экономикалык союзуна кирген өлкөлөрдүн борбордук банктары тарабынан чыгарылып жаткан бардык коллекциялык монеталарды Евразия экономикалык союзунун расмий эмблемасы жана бирдиктүү "Евразия экономикалык союзу" деген аталышы бириктирет.

Монетанын алдыңкы бетинде Кыргызстандын герби түшүрүлгөн. Жогорку бөлүгүндө "Кыргыз Республикасынын Улуттук банкы" жазуусу жана монета чыгарылган жыл чагылдырылган. Төмөн жагында монетанын номиналы (10 сом), сол жагында металлдын сапат белгиси (Ag 925), ал эми оң жагында салмагы (31,10 г.) жазылган.

Монетанын арткы бетиндеги негизги сюжетти евразия мамлекеттеринин интеграциялык жакындыгы түзөт: анын алкагында Евразия континенти түшүрүлгөн, анда Евразия экономикалык союзунун расмий эмблемасы жана ага кирген беш мүчө-мамлекеттердин түстүү желектери чагылдырылган. Монетанын жогорку бөлүгүндө "Евразийский экономический союз", ал эми төмөн жагында "Евразия экономикалык союзу" деген жазуу жайгаштырылган.

Банк монета коллекциясы Евразиялык экономикалык биримдиктин түзүлүшүнүн бир жылдыгына арналарын белгилейт.