БИШКЕК, 23-окт. — Sputnik. Түрмөдөн качып чыккан кылмышкер Алтынбек Итибаевди жок кылуу боюнча операциянын жоопкерчилигин толугу менен өз мойнуна алууга даяр экенин ИИМ башчысы Мелис Турганбаев маалымат жыйында билдирди.
Жыйында министр террористтер менен сүйлөшүп, алар менен макулдашуу мүмкүн эмес экенин белгиледи. Анын айтымында, курал-жарак бар жерде гуманизмге жол берилбейт.
"Өзүңдү көздөй курал менен келе жаткан адамга кандай мамиле кылмак элең? Атасың да. Итибаев менен тил табышуу мүмкүн эмес эле. Туугандары барса да, сүйлөшүүдөн жыйынтык чыкмак эмес", — деди министр.
11 күндөн бери изделген кооптуу делген кылмышкер Итибаев Эркингүл Мамбеталиева аттуу жаранга таандык үйдө жашырынып келген. Кылмышкер Мамбеталиеванын издөөгө алынган уулу Кайрат Салиевдин жакын таанышы болгон. Айрым маалымат булактарында Салиевдин Сирияда көз жумганы айтылууда.
