БИШКЕК, 19-окт. — Sputnik. Укук коргоо органдары "Республика — Ата-Журт" (РАЖ) партиясынан депутаттыкка талапкер Аида Исмаилованын тизмеден чыгуу тууралуу документтерин жасалмалоо боюнча кылмыш ишин козгогонун ИИМ билдирди.
Исмаилова арызын жекшемби күнү жазган. Анда талапкердин атынан белгисиз бирөө депутаттык мандаттан баш тартуу боюнча арыз жазганы айтылат.
"БШК бул арыздын негизинде өз чечими менен талапкерлердин тизмесинен чыгарып салган. Исмаилова "Республика — Ата-Журт" партиясынын курамынан чыкпаганын билдирүүдө", — дейт ИИМ.
Аталган берене менен айыпталып жаткан жак, эгер күнөөсү аныкталса, эки жылдан төрт жылга чейин эркинен ажырайт.
Партиянын юристи Елена Жылкычиеванын Sputnik агенттигине берген түшүндүрмөсүнө ылайык, бардык талапкерлердин, анын ичинде Аида Исмаилованын дооматы негизсиз.
"Жазылган арыздар өз ээлерине таандык, бул далилденди. Алардын бардыгы тең, эгер шайлоодо жетиштүү добуш ала албай калса, тизмеден чыга турганын убада кылган видео жазуу бар, ал сотко жөнөтүлдү. Бардыгы тең материалга тиркелген, бирок сот Исмаилованын ишине гана тиркебептир. Ошого карабай бул талапкердин да депутаттыктан баш тартканы жөнүндө далил бар", — деди юрист.
Жылкычиева жекшемби күнү Биринчи май райондук соту талапкерлердин мандаттан баш тартуу боюнча арызын кайра карабоо жөнүндө чечим кабыл алганын эскерткен. Анда арызды "Республика — Ата-Журт" жана "Өнүгүү — Прогресс" партияларынын өкүлдөрү жазган.
Буга чейин БШК шайлоо жыйынтыгы менен жеңүүчү аталган партиялардын депутаттыктан баш тарткан талапкерлеринин арызын канааттандырып берген.
