БИШКЕК, 19-окт. — Sputnik. Жаңы чакырылыштагы парламенттин биринчи салтанаттуу сессиясы ушул жумада өтүшү мүмкүн экенин Sputnik агенттигине БШК мүчөсүн Жаркын Бапанова билдирди.
Кыргызстанда үстүбүздөгү жылдын 4-октябрында парламенттик шайлоо өтөп, анын жыйынтыгы менен Жогорку Кеңешке алты саясий партия келди.
Баарынан көп 38 мандатка КСДП ээ болду. "Республика — Ата-Журт" партиясы 28 орун ээлей турган болсо, "Кыргызстан" партиясына 18, ал эми "Өнүгүү — Прогресс" партиясына 13 мандат тийди. "Бир Бол" партиясынын 12 өкүлү депутат болсо, "Ата Мекен" партиясы 11 мандат алмай болду.
"Шайлоо жөнүндө" мыйзамына ылайык, жаңы чакырылыштагы депутаттардын биринчи жыйыны шайлоонун расмий жыйынтыгы чыккандан кийин эки жуманын ичинде өткөрүлүшү керек. БШК төрагасы Туйгунаалы Абдраимов расмий жыйынтыкты 15-октябрда жарыялаган.
Бапанованын айтымында, биринчи сессия жаңы депутаттардын акыркы тизмеси даяр болгондон кийин өткөрүлөт.
