БИШКЕК, 19-окт. — Sputnik. Мамлекеттик салык кызматынын Свердлов району боюнча башкармалыгынын башкы инспектору 600 доллар пара алып жаткан жеринен кармалганын УКМК билдирди.
Маалыматка ылайык, аталган кызматкер ири көлөмдөгү салык чегерүү опузасы менен шаар тургунунан 1200 доллар өлчөмүндө пара талап кылган. Инспектор аталган сумманын теңин алып жатканда Коррупцияга каршы кызматтын өкүлдөрү колго түшүрүшкөн.
Бул боюнча инспекторго карата "Кызмат абалынан кыянаттык менен пайдалануу" жана "Пара талап кылуу" беренелеринин негизинде кылмыш иши козголду. Биринчи Май райондук сотунун чечими менен ал УКМКнын тергөө абагына эки айга камакка алынды.
Тергөө иштери жүрүп жатат.
