БИШКЕК, 12-окт. — Sputnik. №50 тергөө абагынан качкандар Кыргызстанда тыюу салынган "Жайшуль-Махди" партиясынын мүчөлөрү болгон. Бул туурасында өлкөнүн Жаза аткаруу кызматынын маалымат кызматынан билдиришти.
Аларга каршы диний экстремизм жана терроризм боюнча кылмыш иши козголуп, эркинен ажыратылган.
Жаза аткаруу кызматынын маалыматында, алар Алтынбек Итибаев, Эдил Абдрахманов, Азамат Мусуралиев "Жайшуль-Махди" партиясынын мүчөлөрү болгон. Ал эми төртүнчү Данияр Кадыралиевдин да ал уюмга катыштыгы бар экендиги маалымдалган.
Алтынбек Итибаев — 1977-жылы Ош шаарында туулган. Буга чейин соттолгон эмес. "Жайшуль-Махди" партиясынын активдүү мүчөсү.
Эдил Абдрахманов — 1986-жылы Чүйдүн Көк —Жар айылында туулган. "Жайшуль-Махди" партиясынын мүчөсү.
Азамат Мусуралиев — 1987-жылы, Жалал-Абад шаарындагы Кара-Көл шаарында туулган. "Жайшуль-Махди" партиясынын мүчөсү.
Данияр Кадыралиев — 1976-жылы Жумгал районундагы Миң-Куш айылында туулган.
"Жайшуль-Махди" уюму туурасында кыргызстандыктарга 2010-жылы Бишкек шаарындагы Спорт сарайынын жанында жарылуу жасагандыгы менен маалым болгон. Ал күндөрү 2010-жылдагы апрель окуялары боюнча сот жараяны жүрүп жаткан.
