БИШКЕК, 8-окт. — Sputnik. Кыргызстандын укук коргоо органдарынын "Кумтөр" компаниясынын мурунку жетекчиси Леонард Хоменюкту Кыргызстанга өткөрүп берүү талабы Болгариянын Видин аймактык сотунун чечими менен четке кагылганын Башкы прокуратура билдирди.
Маалыматка ылайык, аталган мекеме Тышкы иштер министрлиги аркылуу болгар сотунун чечимин расмий тастыктоочу маалымат сураган.
1992-жылдан тарта 2009-жылга чейин "Кумтөр" боюнча келишимдерди түзүүдө коррупциялык аракеттерге барганы үчүн кылмыш иши козголгон Хоменюктун иши учурда кароодо, аны сыртынан камакка алуу боюнча соттун чечими чыгып, эл аралык издөөгө алынган. Шаршемби күнү ал боштондукка чыккан.
Хоменюктун жайгашкан жери тууралуу жаңы маалымат пайда болуп же чет мамлекетте кармалса, Башкы прокуратура анын Кыргызстанга экстрадицияланышы боюнча маселени кайра көтөрүп чыгарын белгиледи.
