БИШКЕК, 6-окт. — Sputnik. Япониянын премьер-министри Синдзо Абэ Кыргызстанга келе турганын Nikkei Asian Review басылмасы жазып чыкты.
Япония өкмөтүнүн башчысы Борбордук Азия мамлекеттерин кыдырмакчы. 22-28-октбярь күндөрү ал Кыргызстан, Тажикстан, Түркмөнстан жана Өзбекстанга барат. Буга чейин япониялык премьер-министр Борбор Азияга август айында келүүгө ниеттенген, бирок ишинин көптүгүнөн сапарын октябрга жылдырган.
Тышкы иштер министрлиги Абэнин Кыргызстанга келүү мөөнөтүн тактай турганын кошумчалады.
Ал эми басылма Япониянын өкмөт башчысы Азия мамлекеттеринин башчылары менен аймактагы коопсуздук, экономика, инвестиция маселелерин талкуулай турганын белгилейт.
"Негизинен Япония аталган мамлекеттерге чек ара постторун курууга, баңгизат аныктоочу жабдыктарды сатып алууга жана инфраструктуралык долбоорлорду ишке ашырууга жардам берүү ниетинде", — дейт басылма.
Маалыматта бул Абэнин Борбор Азияга боло турган алгачкы иш сапары экени айтылат. 2006-жылы регионго премьер-министр Дзюнъитиро Коидзуми келип кеткен.
