БИШКЕК, 1-окт. — Sputnik. Бишкекте милиция кызматкерлерине кол салган топ кармалганын шаардык ИИБ билдирди.
Маалыматка ылайык, 30-сентябрга караган түнү кезметте турган милиция бригадасы "Тойота" үлгүсүндөгү унааны токтотуп, айдоочудан документтерди талап кылат. Мас абалындагы унаа ээси жооп бербестен, жакындарына чала баштайт.
Бир аздан соң эки машина менен келген топ инспекторлор менен чатакташып, мушташ башталат. Топтун ичиндеги балдардын бири кетүүгө аракет кылганын көргөн инспектор аны токтотуу үчүн унаанын капотуна секирип чыгат. Айдоочу машинаны токтотпостон аны 200 метрге чейин айдап барат.
Унааны чукул токтоткондо инспектор кулап, соккудан эсин жоготуп коет. Бишкек шаарынын ооруканаларынын бирине жеткирилген милиция кызматкери башынан катуу жаракат алып, буту сынган. Учурда инспектор реанимация бөлүмүндө жатат.
Аталган факт боюнча кылмыш иши козголуп, милиция бригадасына кол салган төрт жаран изи суубай ошол эле түнү кармалган. Экөөсү убактылуу кармоочу жайга киргизилди.
Тергөө иштери улантылууда.
