БИШКЕК, 30-сен. — Sputnik. Кечээтен баштап Кыргызстандын футбол боюнча курама командасы Тажикстан жана Бангладеш менен боло турган оюндарга даярдык көрө баштаганын Футбол федерациясы билдирди.
2018-жылы өтө турган дүйнө чемпионатынын тандоо турунун алкагындагы беттешүүлөр Бишкекте Дөлөн Өмүрзаков атындагы стадиондо өтөт.
Кийинчерээк машыгууларга Тамирлан Козубаев, Эдгар Бернхардт, Ильдар жана Руслан Амировдор, Мирлан Мурзаев, Виталий Люкс, Виктор Майер, Павел Матяш, Азамат Байматов жана Валерий Кичин келип кошулат. Булардын көпчүлүгү чет элдик футбол клубдары үчүн ойнойт.
Команда Кант шаарындагы футбол жана спорт борборунда машыгууда.
Төрт турдун жыйынтыгы менен тогуз упай топтого австралияктар ишенимдүү алдыда келе жатат. Экинчи орунда жети упай менен Иордания турса, андан кийин куржунунда төрт упайы бар Кыргызстан, акыркы орунда бирден упай алган Тажикстан менен Бангладеш турат.
Дүйнө чемпионатынын финалдык бөлүгү 2018-жылы Россияда өтөт.
