БИШКЕК, 25-сен. — Sputnik. Чым-Коргон айылындагы үйлөрдүн бирине жаңы төрөлгөн ымыркай ташталганын Кемин РИИБ билдирди.
Маалыматка ылайык, жарыкка келген эркек баланын энеси бага албаганынан улам наристени тил каттын негизинде 62 жаштагы тааныш айылдашына таштап кеткен.
Иликтөө иштеринин натыйжасында 28 жаштагы келин селсаяктык жашоо менен күн кечирери маалым болгон. Суракта ал баланы Жалал-Абадда жүрүп төрөгөнүн, Кеминге кайтып келип, баланы бага албастыгына көзү жеткенден кийин өз тааныштарына берип койгонун айтып берген. Мында ал баланын туулгандыгы тууралуу күбөлүк албаганын айткан.
Кемин РИИБ кармалган аялга карата мыйзам чегинде чара көрүлөрүн кошумчалады.
