БИШКЕК, 25-сен. — Sputnik. Кыргызстанда үстүбүздөгү жылдын жети айында былтыркыга салыштырмалуу тышкы миграциянын саны азайганын Улуттук статистика комитети билдирди.
Мамлекеттик каттоо кызматынын маалыматына ылайык, 2015-жылдын январь-июль айларынын аралыгында Кыргызстанга туруктуу жашоо үчүн 2,1 миң адам келсе, 4,4 миң жаран өлкө аймагынан чыгып кеткен. Миграциялык тышкы агым 2,3 миң адамды түздү.
Мында башка аймактарга салыштырмалуу Чүй облусунан жана Бишкек шаарынан кетип жаткандардын саны көп экенин байкоого болот — 10 миң адамга 15-16 адам туура келет. Бул 10 миң кишиге 8 адам болжолдонгон жалпы республикалык деңгээлден жогору экени маалым.
