БИШКЕК, 25-сен. – Sputnik. АКШ Сирияда "капканга" түшүп калды, жана эми Россия менен сүйлөшүүлөрдү жүргүзүүгө туура келет деп жазат Gazeta Wyborcza гезитинде польшалык журналист Давид Варшавский.
"Буга чейин Сирияда Асадды көзүнө илбей, аны бийликтен алууга умтулган АКШ жетекчилиги астындагы халифатка каршы 60 өлкөдөн турган коалицияга кошулууну Москвага кандайдыр бир тоотпогондук менен сунуштап келишкен. Бирок америкалык коалиция бир жылдан бери халифаттын орун алган жерлерин эч ийгиликсиз бомбалоодо", — дейт Варшавский.
Анын айтымында, АКШга "Ислам мамлекетинин" көзөмөлү астындагы жерлерге ээлик кылууга умтулуучу шериктеш жетпей жатат. Сириянын эркин аскеринин жана аны менен байланышкан топтордун алы кеткен, Американын жоокерлерди даярдоо боюнча программасы "көз көрүнөө эле ишке ашпай калды", ал эми жергиликтүү "Аль-Каида" менен Вашингтон экөөнүн "кантсе да жолу эки башка" деп чечмелейт журналист.
Анын пикиринде, Россия Башар Асаддын режимин коргоо ниетинде. Эгер ал АКШ менен макулдаша албаса, ал "Асад үчүн батыш Сирияны коргоп калып, калганын халифатка таштайт".
Ошол эле учурда Сириядагы "глобалдык кайра жүктөө" "ИМге" каршы Асаддын режиминин катышуусундагы эл аралык коалицияны түзүү дегенди билдирмек. Ал болсо өз жеңишинен кийин качкындарды мекенине кайтарууну уюштуруп, аларга жардам берүү үчүн улам өсүп бара жаткан чыгымдардан Батышты куткарып калат эле. Сириянын президенти болсо өткөөл мезгилден кийин өз кадыр-баркын сактап, иштен четтемек да, анын кызматтан кетишине умтулуп жаткан Батыштын да бедели түшпөйт эле деп жазат журналист.
