БИШКЕК, 23-сен. — Sputnik. Астанада Кыргызстандын Казакстандаги элчиси Эсенгул Өмүралиев башка дипломатиялык миссиялардын башчылары менен кошо жашылдандыруу ишине катышты. Бул туурасында ТИМ маалымат кызматы билдирди.
Аталган иш-чара Астана шаарын жашылдандыруу иштеринин алкагында өтүп, аны Казакстан ТИМи жана шаардын акимиаты уюштурду.
Казакстанда катталган дипломатиялык миссиялардын, эл аралык уюмдардын өкүлдөрү Астана шаарындагы "Арай" сейил багындагы дипломатиялык аллеянын ачылышына катышты. Чет элдиктер 80ге чукул бак-дарактар отургузушту. Анда ар бир өлкөнүн элчилигинин, анын ичинде Кыргызстандын Казакстандын Астана шаарындагы элчилигинин тактасы пайда болду.
