БИШКЕК, 23-сен. — Sputnik. Биометрикалык маалыматтоптому "өлүү жандарга" пенсия жана жөлөк пул төлөп берүүгө бөгөт коё турганын премьер-министр Темир Сариев Коррупцияга каршы кеңештин жыйынында билдирди.
Анын айтымында, Кыргызстан мурдагы советтик республикалар арасында парламенттик шайлоону биометрикалык маалыматтардын негизинде өткөрүүгө даярданып жаткан алгачкы өлкөлөрдүн бири болуп саналат.
"Мындай жоопкерчиликтүү чечим кабыл алуу алдында биз иш өтө көлөмдүү экенин билип турдук, бирок бул ачык-айкын, таза жана демократиялык шайлоо өткөрүүнүн жалгыз жолу болуп саналат", — деди премьер-министр.
Сариев коррупциялык схемаларды жоюу боюнча иш-чаралар планы 18 мамлекеттик органда иштелип чыкканын кошумчалады. Коррупциялык көрүнүштөрдү жоюу боюнча иш-чаралардын жалпы саны 1158 түзөт, анын 627си, же 54 пайызга аткарылган, жарым-жартылай аткарылганы 405 (39 пайыз), аткарылбаганы 126 (11 пайыз) түзөт.
"Эң маанилүүсү, Социалдык фонд, Социалдык өнүктүрүү министрлиги сыяктуу мамлекеттик органдардын маалымат базасын тазалоого жетишебиз. Балким, буларда "өлүү жандарга" жөлөк пул, пенсия берүү үчүн чоң суммадагы каражат чыгымдалып жаткандыр. Эми биометрикалык маалымат аркылуу биз каражаттарды ким алып жатканын, ошондой эле башка коррупциялык схемалар тууралуу так маалыматка ээ болобуз", — деп сөзүн жыйынтыктады өкмөт башчы.
Биометрикалык маалымат чогултуу жараяны 2014-жылдын август айында башталып, 2015-жылдын 19-сентябрына чейин созулду. Жеке маалымат тапшырган жарандардын саны 2 миллион 813 миңге жетти.
