БИШКЕК, 18-сен. — Sputnik. Премьер-министр Темир Сариев Бишкектен "Манас" аэропортуна чейинки жол 2016-жылдын август айында бүткөрүлүш керектигин айтты.
Бул маселе анын төрагалыгында өткөн Бишкек — "Манас" эл аралык аэропорту жана Тамчы — Чолпон-Ата жолдордун оңдоого байланыштуу жумушчу жыйында көтөрүлдү.
Транспорт жана байланыш министрлигинин маалыматы боюнча, Бишкектен "Манас" эл аралык аэропортуна чейинки жолду оңдоо боюнча тендер өткөрүлгөн. Маалыматка ылайык, узундугу 24 чакырымды түзгөн аталган жолду оңдоо долбоорлорунун баасы 954 миллион сом деп бааланды.
Сариев бул жолду оңдоо 2016-жылдын август айына чейин бүткөрүлүшү керектигин белгилеп, бөлүнгөн каражатты майнаптуу пайдалануу менен ишти сапаттуу аткарууну тапшырды.
Жыйын жүрүшүндө Тамчы-Чолпон-Ата жолунун оңдоого кеткен чыгым 154 миллион доллар деп эсептелүүдө. Ага ылайык, төрт тилкелүү, заманбап шарттарга жооп берген жол салынмакчы.
