БИШКЕК, 17-сен. – Sputnik. Бүгүнкү күндө биометрикалык маалымат тапшырган жарандардын саны 2 миллион 807 миң 925 адамга жеткенин биринчи вице-премьер Тайырбек Сарпашев журналисттер менен жолугушууда билдирди.
Республикада биринчи жолу парламенттик шайлоодо добуш берүүгө укук берген биометрикалык маалымат тапшыруу жараяны жүрүп жатат.
Сарпашевдин айтымында, шайлоочулардын базасы 2 миллион 670 миң 480 жарандын маалыматынын негизинде түзүлдү.
"Такталбаган жарандардын саны 1 миң 700 адамды түзөт. Алар эч бир шайлоо участкасына катталган эмес. Бирок маалымат базасы күнү-түнү иштеп шайлоочулардын саны өзгөрүп турат", — деди биринчи вице-премьер.
Сарпашев ушу кезге чейин айрым шайлоочулар өздөрүн тизмеден таппай жатканын мойнуна алды.
Ошто 236 миң шайлоочудан 1,5 миң адам өздөрүн тизмеден табышкан эмес. Биринчи вице-премьер комиссия мүчөлөрү тизмени тактап жатышканын белгиледи.
